Amurrio Trail Taldeak Babio Igoeraren edizio berria prestatu du aurten eta ekintza berritzaileak iragarri ditu. Hain zuzen, bi ekimenek bidelagun berriak izango dituzte. Edozelan ere, 'Babio Igoera Non Stop' ekimenaren formula errepikatuko da: jendeak izena eman beharko du hainbat orduz luzatuko den ekimenean, mendi horretara txandaka igotzeko.
Gauzak horrela, abenduaren 23an Zaraobe Institutuko, Aresketa Ikastolako eta Amaurre Ikastetxeko DBHko hirugarren mailako ikasleek mendira joko dute aulki egokitu batekin. Izan ere, gogoratu beharra dago Amurrio Trailek berak, nolabait, bultzatu zuela Ezina Ekinez Egina taldea, eta horrek aniztasun funtzionala duten herritarrak laguntzen dituela aire librean kirola egiten, horrelako tresnak erabilita.
Ekintzetara itzulita, 18:00etan hasiko da Juan Urrutia plazan, berez, '16 ordu Babio Non Stop' erronka. Une horretatik aurrera, eta hurrengo egunean Babioko azken igoera egin arte, orduro aterako dira taldeak Amurriotik gertu dagoen mendi tontor horretara heltzeko.
Izen ematea hemen egin daiteke 10 euroren truke. Diru hori AFARABA elkarteari emango diote. Alzheimerraren eta bestelako gaixotasunen esparruan lan egiten du taldeak.
Edonola ere, diru gehiago biltzeko, Amurrio Trailek Akerbeltz taldearen kontzertua antolatu du 22:00etan Udaletxe aurrean. Txosna jarriko dute eta bertan biltzen duten ekarpen ekonomikoak helburu bera izango du.
Hurrengo egunean, 10:00etan, Babio Igoerari ekingo diote Montes Solidarios eta Ezina Ekinez Egina taldeekin. Helmugan Luis Padura omenduko dute. Gizon hori da mendian dagoen artzainaren eskulturaren egilea. 13:00etan amaituko dute egitasmoa txokolate eta txistorra janarekin.