Hainbat kulturetako familiak mahai beraren bueltan esertzen dituen ekimena da Bizilagunak. Elkarrekin bazkaltzen dute, “zurrumurru arrazistak eta xenofoboak eraisteko eta kulturarteko bizikidetzaren aldeko espazioak sortzeko”. Elkar ezagutzearen onena lemapean seigarren edizioa bete du aurten ekimenak Araban. Urte bakarrean geratu zen dinamika, 2020an, hain zuzen, pandemiaren eraginez. Aurten, Santikurutze Kanpezun, Artziniegan, Amurrion, Laudion, Asparrenan, Langraiz Okan, Urkabustaizen, Agurainen, Oionen eta Gasteizen elkartu dira bizilagunak eta, elkarrekin edizioa ospatzeko, esker jaia antolatu dute larunbat honetan Amurrion bertan.
Elkar ezagutzearen magia deitu diote festari eta, antolatzaileek adierazi dutenez, 150 pertsona inguru batuko dira 11:30etik 13:00ra bitartean luzatuko den egitarauaz gozatzeko. Zeremoniaren maisua Asier Kidam magoa izango da eta Amazigh Agharas musika taldea entzuteko parada izango dute bertaratzen direnek. Egunaren muina, ordea, aurtengo Bizilagunak programan parte hartu duten familiek dinamikarekin ikasitakoak partekatzea izango da. Gainera, familia argazkia aterako dute, “bizikidetzaren aldeko keinu kolektibo gisa”.
Bizilagunak ekimena Arabako Foru Aldundiak eta Zehar-Errefuxiatuekin taldeak antolatzen dute elkarlanean, Zurrumurruen aurkako eta Kulturen arteko Bizikidetzarako Estrategiaren barruan. Ainhoa Campo AFAko Berdintasun eta Giza Eskubideen zuzendariaren ustez, ekimenari esker sortzen diren harremanak lagungarriak dira kulturen arteko bizikidetzarako, elkarrekin bizitzetik bizitza partekatzera igarotzeko. “Horrelako ekimenei esker, Arabako gizarteak gizarte irekia eta askotarikoa dela erakusteko aukera du, errespetuan eta aitorpenean oinarritutako harreman pertsonalak dituena, gure jaioterria, sinesmena edo hizkuntza edozein izanik ere”, zehaztu du.