Hirugarrenez jarriko du martxan Amurrioko Udalak Bizi Gabonak Amurrion kanpaina. Txerra Molinuevo alkateak ekimenaren helburua bikoitza dela adierazi du: “Alde batetik, txikienen ilusioari eusten lagundu nahi dugu, eta, gainera, udalerriko establezimenduetan kontsumitzearen aldeko apustuarekin jarraitzeko aukera ematen digu”.
Izan ere, 2013. urteko urtarrilaren 1etik aurrera jaiotako amurrioar guztiek 15 euroko opari-txekea jaso ahal izango dute, euren edo gurasoen NANa eta familia-liburua aurkeztuta. Urtarrilaren 5era arteko epea izango dute Turismo Bulegotik txartelen bila pasatzeko, honako ordutegian: asteartetik ostiralera 10:00etatik 13:00etara eta 17:00etatik 19:00etara, eta larunbat eta igandeetan 10:00etatik 14:00etara.
Udalak azaldutakoaren arabera, bonuak 2023ko urtarrilaren 20ra arte erabili ahalko dira, eta erabiltzaileek gutxienez 15 euroko erosketak egin beharko dituzte, Amurrioko edozein saltokitan. Tokiko erakundeak argitu du mila haurrek baino gehiagok gozatu ahal izango dutela opariaz eta, horrek, “gutxienez 15.000 eurotik gorako eragina” izango duela.