Elkar ezagutzearen magia lemapean antolatu zuten aurtengo Bizilagunak ekimenaren jaialdi bateratua Amurrion, abenduaren 17an. Asier Kidam magoak eman zion hasiera ekitaldiari eta Amazigh Agharas musika taldea ere igo zen oholtzara. Zenbait abesti jo zituzten, euskaraz, arabieraz eta amazigez.
Zehar-Errefuxiatuekin elkarteko Intzidentzia eta Partaidetza Sozialeko lantaldeko Alessandro Bretanak eta Arabako Foru Aldundiaren Berdintasun eta Giza Eskubideen zuzendari Ainhoa Campok hitza hartu zuten ordezkatzen dituzten erakundeen izenean. Biek azpimarratu zuten ekimenaren garrantzia eta eta Arabako gizartearen aniztasuna.
Hainbat herritatik bertaratu zen jendea ospakizun jaira, 120 pertsona inguru. Izan ere, aurten Santikurutze Kanpezun, Artziniegan, Amurrion, Laudion, Asparrenan, Langraiz Okan, Urkabustaizen, Agurainen, Oionen eta Gasteizen egin dituzte kulturarteko bazkariak, eta partaide guztiak elkartzeko unea izan zen ospakizun jaia.
Parte hartzaileek zenbait opari eraman zituzten: nazioarteko errezeta liburua, poltsa bat eta egutegia. Azkenik, Zehar elkarteak eskerrak eman zizkion Amurrio Udalari eta Amurrio Antzokiari topaketarako erraztasun guztiak eskaintzeagatik.
Argazkiak: Ane Miren Blanco Arregui