Mariano Alava lasai bezain haserre dabil egun hauetan. EAko kide amurrioarraren kontrako akusazioak bertan behera geratu dira, epaileak adierazi ostean ez dagoela inolako frogarik bere aurka eta Iker Ruiz de Egino eta Maider Carreren kontra. Hain zuzen, EAko 'sektore kritikoak' salatu zituen epaitegian alderdiko datuak modu irregularrean erabiltzeagatik, beste pertsonen izaera ordezkatzeagatik eta dokumentazioa faltsutzeagatik.
Elena Rodriguez Molpereces epaileak prozesua eten du, ez duelako ezer adierazgarririk topatu euren kontra eta ez da ezta epaiketarik egongo. Dena den, helegitea jarri dezake akusazioak.
Jarduera politikoaren judizializazioa
Aiaraldea Komunikabidea Mariano Alavarekin jarri da harremanetan erabakiari buruz mintzatzeko eta Amurrioko zinegotziak salatu du 'EAko kritikoek' ekintza politikoa epaitegira eraman dutela alderdiko jendeak ez dituelako eurek nahi zituzten erabakiak hartu: "Prozesu honetan guztian Eusko Alkartasunak beti erabili duen prozedura baliatu dugu, baina kongresuan zein batzarretan jendeak ez duenez bozkatu eurek nahi zutena, gu kaltetzen saiatu dira".
Alavak azaldu du saiakera horretan komunikabide askoren laguntza izan dutela: "Denok dakigu komunikabide batzuen atzean zein interes politiko dauden eta horien helburua izan da EA eta EH Bildu kaltetzea".
Zentzurik gabeko akusazioak
Horrez gain, Alavak argudiatu du salaketa bera zentzugabekeria zela: "Zein zentzu izango luke guk norbaiten izen abizenak erabiltzea datu batzuk lortzeko? Alderdiko ordezkari gisa eskumena genuen hori egiteko, beste edonoren izena baliatu gabe".
Halaber, amurrioarrak uste du epailearen erabakia nabarmen luzatu dela: "Gaur egun oso erraza da jakitea norbaitek beste pertsona baten helbide elektronikoa aprobetxatu duen eta ez dute ezer topatu".
Kalte pertsonala
Kalte politikoa ez ezik, Mariano Alavak aipatu du kostu pertsonala ere izan duela prozesuak: "Gure kideak izan diren eta aspaldi ezagutzen ditugun pertsonek salatu gaituzte, jakinda gu ez ginela errudun. Gainera, akusazioak ez ziren edonolakoak eta kartzelara joateko modukoak ziren. Oso mingarria izan da dena eta uste dut jende honek, bere burua Garaikoetxeistatzat jotzen duenak, politika utzi beharko lukeela. Euskal Herriak ez du behar horrelako jenderik".