Puntako saioa egongo da urtarrilaren 4an Amurrio Antzokian. Orain arte 'Bectekada' izenarekin ezagunagoa zen ekimena, baina Euskal Herriko Bertsolari Txapelketa Nagusiko finala tokiz aldatu denez, deitura ere aldatu diote. Izan ere, Iruñean jokatu zen, bost urteren ostean (pandemia medio), final handia. Orain arte Barakaldoko BEC eraikinean egiten zen, eta finalista guztiak barne hartzen dituen urteko lehen bertso jaialdia delako hartu izan du azken urteetan ospea Amurrioko emanaldiak.
Izena ez, baina izana mantendu dute: Amets Arzallus Antia finalistak izan ezik, gainontzeko zazpirek abestuko dute Amurrion. Hauek izango dira, beraz, datorren asteazkenean kantuan arituko diren bertsolariak:
- Maialen Lujanbio
- Alaia Martin
- Nerea Ibarzabal
- Aitor Mendiluze
- Joanes Illarregi
- Beñat Gaztelumendi
- Sustrai Colina
- Julio Soto (Amets Arzallusen ordez)
Aiaraldea Komunikabideak sarrera bikoitz bat zozkatuko du erabiltzaileen artean. Zozketa urtarrilaren 2an egingo da, eta egunean bertan jakinaraziko da sariduna. Hemen eman daiteke izena. Sarrerak erosteko, berriz, Amurrio Antzokiko atarian eskuratzeko aukera izango dute interesdunek. Txartelek 8 euroko balioko dute, antolatzaileek zehaztu dutenez.