Amurrioko Udalak pauso berri bat eman du zinema eskaintzaz gozatzeko sarreren salmenta sisteman: Internet bidez ere erosi ahalko dira txartelak aurrerantzean. Urtarrilean ezarri zuten sistema, Amurrio Antzokiko webgunea baliatuta. Bertan ikus daitezke hilabete bakoitzerako programatutako ekintza guztiak. Zehaztu dutenez, gainera, 'zinebonoa' ere jarri dute eskura: 12,55 euroren truke 4 film ikusteko txartela. 2024ko martxoaren 21era arte erabili ahalko dute interesdunek, eta 4 pelikulez gozatu ahalko dute modu horretan.
Aipatu sarrerak erosteko, bankuko txartela edota bizum aplikazioa erabili daitezke, edota, orain arte bezala, Amurrioko Kultura Etxera jo. Asteburuetako film emanaldiek 5€ balioko dute, eta astelehenekoek (ikuslearen eguna) 3,75€.
Urtarrileko bigarren hamabostaldian Broker (urtarrilaren 22an eta 23an) eta Todos lo hacen (hilaren 29an eta 30ean) lanak proiektatuko dituzte. Hala ere, urtarrilaren 29an, umeentzat Inspector sun y la maldición de la viuda negra lana eskainiko dute, aurreratu dutenez.