Orain Amurriok ordenantza-proposamen bat erregistratu zuen iragan asteazkenean, partikularrei amiantoa kentzeko emango zaizkien laguntzen administrazio-prozedura “ahal den neurrian arintzeko eta laguntzak ahalik eta lasterren eskuratu ahal izateko”. Talde politikoak ohar bidez jakinarazi zuen 2023ko udal aurrekontuetan 10.000 euroko partida txertatzea lortu zuela “partikularrek eraikin, txabola eta abarretatik amiantoa kentzeko”.
Orain Amurriok egindako proposamenean aurreikusten da amiantoa kentzeko lanen % 90 Udalak diruz lagunduko duela, jarduketa bakoitzeko 1.000 euro arteko mugarekin eta enpresa baimenduen bidez egiten diren lanetan. Talde politikoak ohartarazi zuen amiantodun fibrozementuzko eraikuntza-elementu asko daudela “Amurrioko mota guztietako eraikuntzetan”. “Denboraren poderioz, hondatu egiten dira, eta kalte handiak eragin ditzakete osasunean”, jakinarazi zuen.
Horregatik, opozisioko taldeak uste du laguntza horiekin “eraikinetatik hain toxikoa den minerala kenduko dugula pixkanaka, legez eta arriskurik gabe”.