Yolanda Mosquera ilustratzaile amurrioarraren eta Mercedes Clavo idazlearen Llévame lanak irabazi berri du Cuatro Gatos Fundazioaren saria. Erakunde horrek Miamin dauka egoitza eta gazteleraz argitaratzen diren umeentzako liburuak saritzen ditu, kalitatea aintzat harturik.
Berez, Espainiako Estatuan zein Ameriketan sortutako 226 argitaletxeren produktuak aztertu ditu epaimahaiak eta 1.228 izenburu horien artean 20 hautatu ditu.
Mosquerak argitu du aitortzak ez duela sari ekonomikorik ekartzen, "baina sektorean oso erreferente garrantzitsua da eta liburua bultzatzeko balio du. Agian beste herrialde batzuetan ere argitaratzen animatzen dira, edo liburutegiak aleak eskatzen".
Zentzu horretan, pozik dago, Cuatro Gatos Fundazioaren epaimahaiak estimu handia daukalako ilustrazioaren esparruan.
Estatu Batuetan lan gehiago
Horrez gain, amurriorrak aipatu du 2021eko amaieran Washingtonen ere esperientzia bizia izan zuela, hango Espainiako Estatuko kultura enbaxadan aukeratu baitzuten, Ana Bustelo komisarioaren eskutik, hain zuzen, erakusketa egiteko.
"Enbaxadaren egoitzan egon behar zen oinarrituta, eta nik ikertu nuen eraikinaren lanen ardurak izan zituen emakumeari buruz, Mary Foote Henderson. Horrez gain, neguko solstizioa izan nuen hizpide, abenduan egon baitzen ikusgai erakusketa. Azkenean, 'matronazgoa' eta jaiotza irudikatzen zuen marrazkia sortu nuen" azaldu du ilustratzaileak.
Lan hori enbaxadaren aurrean egon zen ikusgai hilabete oso batez.