Martxoaren 11n Orbeko Etxean CNTko sei kideren aldeko egitasmoa izango dute. Hasteko, 'La Suiza' deituriko kasua azalduko dute, sindikatu anarkistako dozena erdi militante kartzelan sartzeko arriskuan baitaude hori dela medio. Epaileek 3 urte eta erdiko zigorra ezarri dizkiete pikete batean aritzeagatik.
Gero, lau taldek joko dute eta horien artean dago UR. Black Metal generoa jorratzen duen banda hori 2005ean sortu zuen Isma Lopezek: "Mortinatum eta Nakkigako partaideok 666 Proiektua genuen eta hori bertan behera geratzean, hirukote moduan genituen abesti batzuk gure proiektu pertsonalekin grabatzea pentsatu genuen, Hellthrone, Sentimen Beltza eta UR taldeak agertu ziren orduan".
Gauzak horrela, amurrioarrak hartu zuen bere gain taldearen ardura eta musika tresna guztiak grabatzeari ekin zion: "Batzuetan laguntza nuen bateriarekin edota musika tresna tradizionalekin. Urteetan zehar maketa eta lan elkarbanatu batzuk ateratzen joan nintzen, adibidez, Gaua, IV V I IV, Sentimen beltza edota Letvm leteo, beste taldeekin".
Horrez gain, bi disko ere atera ditu, bata Erromatar inperioak egindako konkisten aurka eta beste bat uraren bidaiari buruzkoa, zerutik erortzen denetik itsasora heldu arte.
Lagun gehiago batu dira taldera
Azken disko hori zuzenean jotzeko, Isma Lopezek Errioxako lagun batzuk batu zituen proiektura. Alde batetik, Alvaro eta Joseba, Ataxia eta RDT taldetakoak; eta, bestetik Txitxas, Etniakoa.
Hasieran disko horren abestiak jotzea zen helburua, baina orain kanta berriak sortu eta beste talde batzuenak ere prestatu dituzte. Horrela, grabaketa estudioan sartzea espero dute laster eta zuzenekoak maiztasun gehiagorekin eskaintzea. Izan ere, URek kontzertu gutxi eman ditu eta nahiko ezezaguna da eskualdean bertan, nahiz eta Orbekon edota Burubio Kulturgunean jo duen noizbait.