Amurrioko natur parkeen egoeraren diagnostikoa egiteari ekin dio Udalak, Orain Amurrioren ekimenez. Azterketa horiek egiteko diru-partidak erreserbatzea proposatu zuen oposizioko talde politikoak iazko eta aurtengo udal aurrekontuetan, eta iragan martxoaren 15ean egin zuten ekimena abian jartzeko lehen bilera.
Talde politikoetako eta udalerriko hainbat elkartetako ordezkariak bildu ziren bertan, eta bigarren zita bat zehaztu dute dagoeneko, “diagnostikoaren lehen fasea hasteko”.
Orain Amurrioren ustez, Amurrioko natur parke batzuk “hondatuta” daude edo ez dira behar bezala erabiltzen ari. “Aresketamendiko energia berriztagarrien parkeak eta Goikomendi-Kuxkumendi parkeak ez dute bisita gidaturik eskaintzen eta nahiko hondatuta daude”, azaldu du talde politikoak, “Izartzako ingurumen zentroa ez da inoiz ireki, nahiz eta hainbat elkartek erabiltzen duten espazioa, baina erabileraren erregulazio berezirik gabe”.
Gauzak hala, parke horiek “suspertzea” izango da diagnostikoaren azken helburua. “Bioaniztasunaren kontserbazioa, haren azterketa eta garatu beharreko ekintzak funtsezkoak dira, oro har, eta, bereziki, Amurrion. Aspalditik egiten ari diren arren, beharrezkoa da gure natur eta gizarte ondarea bultzatu eta zabaltzea”.