Asteburu bizia izan dute Amurrioko Aresketa Klubeko kideek. Larunbatean egun osoa igaro zuten Bañueta kiroldegian sartuta, Aresketa Torneoaren XIV. edizioan murgilduta. Klub ugari bertaratu ziren topaketara, eta guztira 400 gimnasta egon ziren lehian, goizez zein arratsaldez.
Amurrioko klubeko kideak ez dira probak antolatzera mugatu. Aresketako hainbat kirolari lehiatu ziren egunean bertan, eta sari zein sailkapen esanguratsu ugari eraman zituzten etxera.
Kimuak 'Urdina' taldeak lehen postua erdietsi zuen bere kategorian eta Kimuak 'Laranja' taldea bigarren geratu zen. Benjaminetan, aldiz, bigarren postua lortu zuen Aresketa 'Horia' taldeak.
Banakako norgehiagoketan Ibone Morales 5. geratu zen uztaiarekin eta 4. mazoekin, eta 3. postua erdietsi zuen sailkapen orokorrean. Irene Larrazabalek 5. saria eskuratu zuen pilotarekin, Elene Banderak 3. postua lortu zuen, eta Maddi San Jose izan zen pilotako txapelduna Benjamin B kategorian. Arene Ruizek 5. postua lortu zuen tresnarik gabeko modalitatean, Ane Rodriguez 4. izan zen eta Maddi San Jose, aldiz, 2. izan zen.
Hurrengo helburua, Espainiako Txapelketa
Igandean ere ez ziren geldirik egon Aresketako kideak. Amurrioko klubeko kide asko Euskadiko Txapelketako Lehenengo fasera joan ziren, maiatzean Espainiako Txapelketarako txartela lortzeko.
Jon Rivera izan zen horietako bat. Gimnasta gaztea lehena geratu zen Bañueta kiroldegian mazoekin eta uztaiarekin, eta apirilean jakingo du Espainiako Txapelketara joateko aukera duen edo ez.