Guk Elkarrekin Podemos izango da Leticia Jimenez alkategai izango duen koalizioaren apustua. Hain zuzen, Guk Bai taldekoekin lotura izango du Elkarrekin Podemosek, nahiz eta beste "alderdi progresista" batzuekin ere osatzen ari diren zerrenda, Ezker Batua kasu.
Gaur goizeko hamarretan egin dute zerrendaburua aurkezteko ekitaldia Amurrioko Kultura Etxean. Leticia Jimenez izango da euren alkategaia, eta Beatriz Izagirre izango du bidelagun bigarren postuan. Aurreratu dutenez, zerrenda ixten ari dira; eta beranduago aurkeztuko dute hautagaitza osoa.
"Ongizatedun herria, Amurrio erakargarria nahi dugu. Positiboki eraikitzen jarraituko dugu tokikotasunetik", azpimarratu du Beatriz Izagirre zerrendakideak
Lan-lerro batzuk ere azaldu dituzte ekitaldian, 2023-2027 lege-agintaldian eragin nahi dituzten aldaketen berri emateko. Horien artean daude komertzioa sustatzea, edota garraio publikoa hobetzea: "Ez dugu bus geltokirik, markesina soil bat baino ez; zeinetan goizero 30 lagun dauden hotza pasatzen edo bustitzen".
Osasun sisteman eta baliabideetan ere sakondu nahi dute. Gazteriari begira, emantzipatzeko dauden arazoak mahaigaineratu dituzte. Funtsean, nabarmendu dute "ongizatedun herria" nahi dutela, Amurrio erakargarria.
Beatriz Izagirreren hitzetan, maila guztietan egin nahi dute politika: "Leticia Jimenezekin osatutako tandemean gure ingurunea aberastea nahi dugu. Positiboki eraikitzen jarraituko dugu tokitik, globaltasunak kabida izanik".