Saria eskuratu du Laztana Laztana taldeak Durangoko Abesti Feministen V. Lehiaketan. Sandra Vargas bakarlari barakaldoarrak sortu du proiektua, baina beste bi musikari ditu bidelagun: Jorge Larracoechea mexikarra eta Karla Velarde Castro amurrioarra.
Bibolina jotzen du Velardek, eta unibertsitatean egin zen Vargasen lagun. “Biek ikasi dugu musika klasikoa eta ikusi genuen nahiko feeling musikal handia genuela eta ondo ulertzen ginela zentzu horretan”, azaldu du Aiaraldeko musikariak, “une horretan Sandrak bazuen beste proiektu informalago bat, baina gero serioago hartzen hasi zen”. Orduan egin zuen salto bakarlariak hirukote formatura, Laztana Laztana izen artistikoarekin. Iragan udan eman zuten lehen urrats sendoa: estudioan sartu ziren hainbat abesti grabatzera, eta iragan otsailean argitaratu zuten lehena, Sua izenekoa.
Abesti berriak eta kontzertuak
Datozen hilabeteetan plazaratuko dituzte jada grabatuak dituzten beste kantak, EPa osatzeko. Vargasen hitzetan, abestiak nahiko ezberdinak dira euren artean, eta elektronika eta fusioa dituzte ardatz. Hala ere, kanta guztiek “osotasun bati” erantzuten diotela nabarmendu du. “Gure oinarri klasikoetatik abiatu gara gauza berri bat sortzeko. Nire ustez, ez dago horrelakorik oraingo panorama femenino eta euskaldunean”. Ildo horretan, gazte amurrioarrak nabarmendu du proiektua euskaraz izango dela eta, ondorioz, “euskara sustatzeko bide bat” izan daitekeela.
Solasaldi musikatua apirilaren 14an Faktorian
Laztana Laztana proiektua gertutik ezagutzeko aukera eskainiko du Aiaraldea Komunikabideak datorren apirilaren 14an, ostirala, Faktorian. Solasaldi musikatua egingo du hiru taldekideekin 19:00etan. Sarrera doakoa izango da.
Argazkia: Julen de la Serna