20 ekintzek osatuko dute San Jose jaietako egitaraua. Apirilaren 29an hasiko dira, 11:00etan balkoi eta leihoen apainketa deialdiarekin. 12:00etan jaurtiko dute txupina, eta jarraian abiatuko dute trikipoteoa. Ohi gisa, babarrun jan herrikoia izango dute eguerdian, eta Saratxaga taldearekin dantzaldia egingo dute segidan. Hala, arratsaldean Euskadiko Trial Txapelketa jokatuko da San Roken, 16:00etan. 18:00etan, berriz, buruhandiak izango dira protagonista, eta 19:00etan Aiara Dantza Taldekoen emanaldiak hartuko du lekukoa. Gaueko eskaintza, berriz, Zirkiñik bez erromeriak eta DJ Esmederrek osatuko dute.
Igandean, apirilaren 30ean, Akelarre txarangak esnatuko ditu kaleak, 12:30ean. Hurrengo ekintza, baina, arratsaldean izango da, 17:30ean gauzatuko baitituzte haurrentzako tailer eta jolasak. 18:30ean, aldiz, Kuskua elkartearen eta Aresketa Gimnasia Erritmikoaren txanda izango da; eta 19:30ean flamenko musika kontzertua eskainiko dute La piti por rumbas eta Los primos taldeek. Domeka borobiltzeko, Extremoduro, Platero y tu eta Marea taldeen tributua den Hay poco rock&roll taldea oholtzaratuko da.
Astelehenean, txirrindularitza lasterketa klasikoa jokatuko da, 11:00etan abiatuko dena San Jose auzotik. 12:30ean meza egingo dute, eta 13:00etan bermut girotua, Cigarette Break taldearen eskutik.