Baranbioko Administrazio Batzarrak apustu garrantzitsua egin du biztanle gehiago erakartzeko eta bi aste barru lanak hasiko dira "nesken eskola ohian eta irakasleen etxebizitza ohian". Eraikinak bergaitu ondoren, alokairuan eskainiko dituzte. Konponketak urtebetean amaitzea aurreikusi dute.
Obrek 365.000 euro balioko dute, eta Eusko Jaurlaritzak 100.000 euroko ekarpena egingo du. Arabako Foru Aldundiak, aldiz, 25.000 euro bideratuko ditu. Gainerakoa Baranbiok berak hartuko du bere gain, hau da, 240.000 euroko inbertsioa.
Edonola ere, oraindik adostu behar dute Baranbiok eta Eusko Jaurlaritzak zein eredu erabiliko den alokairurako, baita baldintzak ere.
Saiakera anitz
Proiektua egikaritzeko bidea, ordea, ez da erraza izan. Jesus Mari Bernaola Baranbioko Administrazio Batzarreko presidenteak azaldu duen moduan, 2008an lursaila erosi zuten 12 etxebitza eraikitzeko, baina adreiluaren krisialdiak bete-betean eragin zion egitasmoari, eta bertan behera utzi behar izan zuten. "Berriro mahai gainean jarri genuenean proiektua Eusko Jaurlaritzaren arauak erabat aldatu zituzten eta ezinezkoa da han ezer egitea".
Gero, Babes Ofizialeko Etxebizitzak sortzeko ekimena abiatu zuten, eta beste erakundeetako dirulaguntzak ere eskuratu zituzten. Ordea, Baranbiok egin behar zuen erabilera dela medio, Zuzkidura-alojamendua zen definizio legal egokiena eta dena ezer ezean utzi eta berregin zuten proiektua esparru horretan sartzeko.
Baserriak erortzear
Jesus Mari Bernaolaren ustez, herri txiki guztiek dituzte arazoak herritar berriak lortzeko. Baranbioren kasuan, ordea, badago gehitu behar den aldagaia: "Baserri asko daude hutsik, baina jabeek ez dute nahi ez saldu, ez alokatu".
Bernaolaren aburuz, baserriak gizartearen ondarea dira, eta gehienak erortzear daude. Hortaz, exijitzen die erakunde publikoei tresnak sortzeko hori gerta ez dadin.