Ehunka herritar elkartu dira gaur 19:00etan Amurrioko Juan de Urrutia plazan eginiko elkarretaratzean. Mobilizazioa ANkerkeriari Stop! plataformak deitu du, Auzitegi Gorenak gaur berrikusi baititu defentsak zein fiskaltzak aurkeztutako helegiteak Galder Barbado eta Aitor Zelaia gazteen kasuaren inguruan.
Plataformak "ametsgaiztotzat" jo du bi gazteen kontrako epaiketa eta gogoratu du bost urte bete direla atxilotu zituztenetik. Tarte horretan sei hilabetez egon ziren espetxean, duela bi urte epaitu zituen Entzutegi Nazionalak eta geroztik egon dira behin betiko epaiaren zain.
Izan ere, Angela Murillok lau urteko espetxe zigorra ezarri zien, “helburu terroristarekin lehergailuak egiteko elementuak gordetzeagatik”. Fiskaltzak zortzi urteko zigorra eskatzen zuen eta defentsak, aldiz, absoluzioa.
Egungo egoeraren aurrean, eta aintzat hartuta Barbado eta Zelaia edozein unetan espetxeratu ditzaketela, plataformak elkartasun jardueretan parte hartzeko gonbidapena zabaldu du: "Orain inoiz baino gehiago, hurrengo deialdietara adi egon eta Auzitegi Gorenaren sententziak dakarrenari erantzuteko deia egiten dugu".