Amurrioko EAJk aste honetan azaldu ditu zeintzuk diren bere hamar konpromisoak hurrengo legealdiari begira. Alderdiak ziurtatu du "jeltzaleen proiektua Amurrioko eta inguruko egungo egoeraren diagnostiko batetik" hasten dela, eta, "horri esker, herriaren ahultasun, arrisku, indargune eta aukera nagusiak identifikatu" ahal izan direla.
Zehazki, Txerra Molinuevo alkategaiak honakoa adierazi du: "“Zerbitzu gehiago, azpiegitura gehiago, kohesio gehiago, kultura gehiago, identitate gehiago eta iraunkortasun gehiago. Hori da etorkizunerako nahi dugun Amurrio, pertsonen ongizatea eta bizi-kalitatea ardatz nagusi izango dituena, kolektibo ahulenei lehentasuna emanez. Adin guztientzako aukerak eta zerbitzuak eskaintzen dituen udalerri baten alde lan egingo dugu, hemen bizitzeko erakargarriak diren azpiegiturekin eta kalitatezko enplegu-aukerak sustatzen. Azken batean, Amurrio bizitza-proiektu bat eraikitzeko lekurik aproposena izatea, eta bertan bizitzeaz harro sentitzea, pertsona guztiek baitute lekua”.
Puntuz puntu, honako hauek dira EAJk garatutako programaren oinarriak:
1. Enplegua ikuspenarekin: Kalitatezko enplegua sortzea, prestakuntza, berrikuntza eta ekintzailetza sustatuz, Amurrio Bidean eta Aiara Industrial Lab erakundeekin batera.
2. Eguneko zentroa eta etxebizitza komunitarioa: Mendeko pertsonentzako eguneko zentroa eta etxebizitza komunitarioa batzen dituen baliabide berria. Zahartze aktiboa sustatzea.
3. Kultur etxea eta merkatu zaharra: Kultur Etxea birmoldatzea eta handitzea. Merkatu Zaharraren erreforma, kultura-ekimenak dinamizatu eta konektatzeko.
4. Kiroldegia eta frontoia: Udal kiroldegia eta frontoia berritzea. Refor erabiltzeko aukera hobetzea, bizimodu osasungarri eta aktiboa sustatzeko.
5. Parke lineala eta Nerbioi ibaia: Parke lineala amaitzea eta inguruari balioa ematea. Mugikortasun jasangarria bultzatzea. Nerbioi ibaia berreskuratzea.
6. Lurpeko pasabidea: Trenbidearen azpiko lurpeko pasabidea bultzatzea Boriñaur inguruan, udalerriaren bi zatiak lotzeko.
7. Aparkaleku berriak: Aparkaleku berria, Epaitegiaren inguruan elektrolinera duena, tokiko merkataritza eta ostalaritza sustatzeko.
8. Alokairuko etxebizitzak eta hiri-berroneratzea: Alokairuko etxebizitza publikoen eraikuntza bultzatzea eta Goikolorra eta Landako hiri-berroneratzeari ekitea.
9. Transitzio energetikoa: Trantsizio energetikoa bultzatzea autohorniduraren bidez, energia komunitate berriztagarrien ekimenen bidez, hala nola EKIOLA.
10. Berdintasuna: Politika feministak ezartzea, Aingurak V. Berdintasun Plana garatuz. Indarkeria desagerraraztea. Aniztasuna aldarrikatzea.