Josune Irabienek hirugarren aldiz jarraian eskuratu zuen Amurrioko Udaleko aginte makila 2019an. 2020ko azaroan, aldiz, Txerra Molinuevok hartu zuen bere lekukoa, eta bera izango da jeltzaleen alkategaia datorren maiatzaren 28ko udal hauteskundeetan.
2019ko hauteskundeen emaitzak ikusita, lehia nagusia EAJ eta EH Bilduren artean egongo dela aurreikusi daiteke. Lehenak 2.413 boto lortu zituen orduan (%42,12) eta bigarrenak, aldiz, 1.990 (%34,74). Modu horretan, 8 eta 7 ordezkari lortu zituzten, hurrenez hurren. PSE-EE eta Orain Amurriok, aldiz, zinegotzi bana izan dute azken legealdian, 484 eta 297 boto lortuta. Sozialistek jeltzaleek gobernua babestu zuten 2019an, baina ez ziren udal gobernuan sartu.
Datu horiek ikusita, argi dago lehen bi alderdien artean egongo dela lehia nagusia, baina ez bakarra. Izan ere, aktore berriak sartu dira mapa politikoan: Guk Bai talde independenteak Elkarrekin Podemosekin batu ditu indarrak, eta horrek PSE-EE edota Orain Amurrioren ordezkaritzan izan dezake eragina, Udalbatzan aldaketak eraginez.