Nola joan zen atzoko eguna? Nola jaso zenuen emaitza?
Urduri pasa dut egun osoa, ez baitakizu inoiz zer gertatuko den. Azkenean, zortzigarren zinegotzia mantentzea lortu dugu, nahiz eta garaipena nahiko estua izan den. EH Bilduk zazpi zinegotzi lortu ditu, eta PSE-EEk bat gehiago lortu du.
Udal osaerari dagokionez, antzera geratuko da, baina sozialistek indar gehiago izango dute. Horrez gain, Orain Amurriok ordezkaritza galduko du.
Gehiengo osoa izatea espero duzue, berriz?
Datozen asteetan negoziatuko dugu hori, Euskal Herriko emaitzak ikusi ostean. Gaurtik aurrera gauza gehiago baloratu beharko dira, datuak aztertuta. Duela lau urte PSE-EErekin gehiengo osoa eduki genuen; eta logikoa litzateke jarraitzea. Hala ere, PSE-EE eta EH Bildurekin batuko gara, guztiekin, hain zuzen. Gainontzeko lekuetako emaitzak baloratuta hartuko dugu erabakia.
Emaitzen zein irakurketa edo balorazio egiten duzue?
Pozik gaude, baina poza neurrikoa da. Euskadi mailan ez dira emaitza onenak izan gure alderdiarentzat, nahiz eta Amurrion olatuari eutsi diogun: indarra mantendu dugu, baita zortzigarren zinegotzia ere. Uste dugu helburua bete dugula eta pozik egon gaitezkeela. Bihartik aurrera, lanean jarraituko dugu.
Datozen aste edo hilabeteetan zeintzuk izango dira zuen erronkak?
Udal hauteskundeetan aipatu ditugun proiektuak garatzea. Uste dut kanpaina ona egin dugula, eta amurrioarrek aitortu egin digute hori: merkatu zaharra, trenbidearen obra, eguneko zentroa, aparkalekuak... Dezente mobilizatu gara, eta Amurrion nabaritu egin da hori. Horregatik pentsatzen dut eutsi diogula, eta talde guztiari eskerrak eman nahi dizkiot.
Era berean, berdintasun eta feminismoaren alde lanean jarraitu nahiko genuke; eta aniztasuna jorratzen. Zaintzari ere heldu diogu.
Udal bilkuran aldaketak datoz, ordezkariei dagokienez...
Bai, hiru alderdi politiko geratuko gara. Alabaina, guk zortzi zinegotzi ditugu, eta EH Bilduk zazpi. Beraz, indar aldetik pareko gaude. Orain Amurrioren zinegotzia PSE-EEk eraman du, baina hori da aldaketa bakarra. Alderdi txikien desagerpena, eta sozialisten gorakada. Duela 11 urte bezala geratuko gara kasik.
Amurrioarrei begira, zein mezu nahiko zenuke zabaldu?
Eskerrak eman nahi dizkiet bozkatu gaituzten guztiei EAJren izenean. Bihartik aurrera lanean jarraituko dugu, gure programa betetzeko.