Galder Barbado eta Aitor Zelaia gazteek jasotako behin betiko sententziaren aurka azaldu da Sare. Ohar bidez, euskal presoen eskubideen aldeko eragileak gogor kritikatu ditu Auzitegi Gorenak duela astebete berretsitako lau urteko espetxe zigorrak.
Bost urtez luzatu den prozesu judiziala eta sententzia bera "zentzugabetzat" jo ditu Sarek. "ETAk jarduera armatuari amaiera emateko erabakia hartu zuenetik 12 urte igaro diren arren, eta desegin zenetik bost urte igaro diren arren, badira etengabeko gatazkari eusten saiatzen direnak", adierazi dute oharrean.
Epaia "mendeku tresna gisa erabilitako justiziaren praktika" dela salatu du Sarek, eta Barbado eta Zelaiaren aurkako epaiketa "froga irmorik gabekoa" izan zela gaineratu du. "Urte luzez luzatu den indarkeriaren mamua betikotzeko jarrera nabaria da".
Espetxeak husteko unea
Sareren iritziz, espetxeak betetzen jarraitzeak "ez du inolako kabidarik elkarbizitzarako eta bakerako bidean". Kontrara, "espetxeen problematikari aterabidea eman eta sufrimendu guztiekin amaitzearen alde urratsak" ematearen beharra aldarrikatu du.
"Hala eta guztiz ere, edo, hain zuzen ere, horregatik, Sare Herritarra elkartetik adierazten dugu bakearen, bizikidetzaren eta konponbidearen alde lanean jarraitzeko borondatea dugula eta horretan jarraituko dugula burubelarri. Hori baita euskal gizartearen gehiengo zabalak guztioi eskatzen diguna", nabarmendu dute oharrean.
Mobilizatzeko deia
Azkenik, sententziaren aurka eta bi gazteen alde datozen egun eta asteetan deituko diren mobilizazioetara batzeko deia egin du Sarek.
Lehenengo hitzordua igande honetan izango da, Amurrioko Zabaleko Ikastetxeko patioan ANkerkeriari STOP plataformak deitu duen agerraldi masiboan.