Amurrioko Eskubaloi Taldeak ate irekien jardunaldiak egingo ditu gaur eta ostegunean, kirol horren zaletasuna sustatzeko. 18:30etik 19:30ak arte izango dira hitzorduak Zaraobe Institutuan.
Berez, Jatsu Oseguerak (ekimenaren sustatzaileetako batek) azaldu du taldea denboraldi honetan sortu dela eta 15 bat umek parte hartzen dutela, "baina adin ezberdinetakoak direnez, bi talde osatu nahi ditugu, 8 urtekoa eta 10-11 urtekoa, Arabako Ligan jokatu dezaten hurrengo denboraldian".
Amaitu berri den denboraldi honetan gazteek lagunarteko partidak jokatu dituzte Gasteizen, Laudion eta Arrankudiaga-Zollon eta sentsazioak oso onak izan direnez, txapelketa ofizialean lehiatzeko asmoa dute hurrengo denboraldian.
Gaur eta osteguneko deialdian parte hartu eta esperientzia interesgarritzat jotzen dutenak hurrengo denboraldian sartu ahalko dira taldean. Entrenamenduak astearteetan eta ostegunetan egingo dituzte 16:45tik 18:15ak arte.
Laudio eta Amurrioko taldeen elkarlanari esker, 10 urte baino gutxiagoko ume amurrioarrek aukera izango dute Laudion entrenatzeko, baldin eta euren herrian ez badira taldea osatzera iristen. 616 069 978 telefono zenbakira deitu beharra dago izena emateko.