Uztailaren 3tik 31ra bitartean Oporretan ere euskaraz programa itzuliko da Amurriora. Bost eta hamabi urte bitarteko haurrek jolasekin, abestiekin, tailerrekin eta txangoekin gozatzeko aukera izango dute hilabete osoan zehar. Hauek, ekainaren 10era bitarte eman beharko dute izena Kultur Etxean.
Jarduerak uztailaren 3tik 31ra izango dira eta aurten 2019 eta 2020 urteetan jaiotakoek parte-hartzeko aukera izango dute.
Aurtengo berrikuntza nabarmena herriko txikitxoenei eskaintza zabaldu izana da. Lehen aldiz 2019an eta 2020an jaiotako haurrek ere udako programazio berezi honetaz gozatzeko aukera izango dute, “haientzat bereziki diseinatutako jarduerekin”. Beren ordutegia 09:30etik 13:30era izango da eta Armurulanda plazan dagoen Ludotekan egingo dituzte ekintzak.
Amurrioko Udalak jakinarazi du B eta D ereduetan ikasten duten haurrek baino ezingo dutela programa horretan parte hartu. Amurrioko Udalaren webgunean topa dezaketen aurreinskripzio orria bete beharko dute eta Kultur Etxean entregatu edo posta elektroniko bidez partehartzea@amurrio.eus helbidera helarazi. Ekainaren 7ra arteko epea dute horretarako. Izan ere, plaza erabilgarri baino izen-emate gehiago egonez gero, ekainaren 8an zozketa egingo du Amurrioko Udalak eta, ondoren, ekainaren 14ra arte zabalduko dute behin betiko izena emateko epea. Onartuen zerrendak ekainaren 16an argitaratuko dituzte Kultur Etxean. Matrikularen prezioa 62,06 eurokoa izango da eta bi anai-arreba edo gehiagoren kasuan, ume bakoitzak 55,87 euro ordaindu beharko ditu.