Nondik dator Txabola Eguna antolatzearen ideia?
Gure jaiekiko ikuspuntuan, herria girotzeko nahi horretan, pentsatu genuen egokia izango zela urtean zehar ekintza gehiago egitea. Ez dugu jai-giroa abuztuko jaietara mugatu nahi bakarrik. Hortik sortu zen zerbait antolatzearen ideia.
Hasiera batean gaueko eskaintza prestatuko genuen soilik baina, azkenean, egun soko egitaraua prestatu dugu: bazkari bat egingo dugu, haurrentzako jolas-parke bat muntatuko dugu, poteo pare bat egingo ditugu herritik, karaokea, zezen-mekanikoa…
Ziur gauza asko geratuko zaizkigula hobetzeke, baina joango gara gure akatsetatik ikasten urtez urte jai hobe bat antolatzeko. Giltzarraporen festarekin ere antzeko zerbait gertatu izan zaigu: pixkat desastre izan zen hasieran, baina hobetuz joan gara ere.
Honakoa da Txabolakoak kuadrillak herriko jai egunetatik kanpo antolatzen duen lehenengo ekintza?
Bai, duela sei urte sortu genuen kuadrilla, eta orain arte abuztuko jaietara mugatu dugu gure jarduna. Jai Herrikoien Aldeko Batzordean parte hartu dugu, baina Txabolakoak bezala hau da gure lehenengo ekintza.
“Amurrioko jai-giroa suspertzeko” helburuarekin sortu zenuten kuadrilla duela sei urte. Nolakoa izan da egindako ibilbidea?
Nik uste berritzaileak izan garela. Gure helburua beti izan da zarata egitea, eta horrela aldarrikatu dugu beti jaietako aurkezpen hitzartzeetan; izan baflearekin, bonboarekin edota ekintzetan parte hartuz.
Karrozen desfilearekin eta hauen prestaketarekin argi ikusi daiteke hori. Guk karrozen prestaketa festaren parte bihurtu dugu. Ez dut orokortu nahi, baina lehen kuadrilla bakoitzetik hamar lagun elkartzen ziren. Orain garagardo eta musika artean muntatzen ditugu karrozak, gure festa bertara ere eraman dugu.
Zer espero duzue Txabola Egunetik?
Amurrioko kuadrilla eta pertsona guztientzako festa bat izatea nahiko genuke. Gurekin giroa sortzera animatzen den oro ongi etorria izango da. Auskalo datorren urtean berriro antolatzen dugun. Guk ez dugu jai-egun huts bat bezala ikusten, baizik eta urtean zehar ere Amurrio pizteko ekintza bat bezala.
Eta Amurrioko Jaiei begira zer aurreikuspen dituzue?
Zarataren premisa horretatik abiatuta, herriko kaleak girotzen jarraituko dugu. Geroz eta kide gehiago gara, beti dago norbait zerbait prestatzeko prest.