Nabari da uda iristear dela, eta ez soilik eguraldian. Asteburuko agenda ere da horren adierazle. Geroz eta ospakizun gehiago pilatzen ari dira, urteroko egutegiari jarraiki. Iragan igandean Txakolin Eguna egin zen Amurrion, eta honetan tradizioz beteriko beste jai bat egingo da alboko herrian, Baranbion: Ahuntz Eguna.
Ohiko ereduari jarraiki, Garrastatxuko Baselizaren inguruetan egingo da ospakizuna igande goizean eta, jaiaren izenak argi uzten duen bezala, adardun animaliak izango dira protagonistak egitarauko ia ekintza guztietan.
Hau izango da igandeko plana:
8:15 // Ahuntzen XV. Lehiaketa
8:15 // Ahuntz azienden feria (arraza guztiak)
12:30 // Ahuntz eme txapelketa
13:00 // Aker txapelketa
13:30 // Bolilla
13:30 // Akerren pisatzea
14:00 // Ahuntzen XV. Lehiaketaren sari-banaketa
14:45 // Herri bazkaria
17:00 // Erromeria
Dena den, jaia ostiralean hasiko da. Solasaldia eskainiko dute 20:00etan santutegiaren barruan, eta afaria egongo da gero, bertaratutako guztientzat, txokoan.
Askatasun Martxa
Aipatutako programazioari, beste ekintza bat batuko zaio igandean: Garrastatxuko Askatasun Mendi Martxa. Urtero antolatzen dute ibilaldi hori euskal preso politikoen eskubideen alde, eta antzeko eskema izaten du beti.
Bi ibilbide egongo dira. Luzea 7:30ean abiatuko da Garrastatxutik eta 22,9 kilometro egingo dituzte inguruko mendietan barrena. Laburra ordu erdi beranduago aterako da, eta 8,5 kilometroko luzera izango du.
Inskripzioak 10 euro balioko du aurretik eta 12 euro, aldiz, egunean bertan eginda. Hemen eman daiteke izena martxa luzean eta hemen, aldiz, laburrean.
