Ekainaren 23an helduko da pantaila handira Una vida no tan simple filma eta igandean eta astelehenean ikusgai egongo da Amurrio Antzokian, 19:00etan. Horren arrazoia da Einar Palacios Elejalde amurrioarrak debuta egin duela Miki Esparbe antzezleak egin duen pertsonaiaren semearen papera eginez.
Einarrek hiru urte zituen filma grabatu zuenean eta bost beteko ditu estreinaldiaren egunean. Bere gurasoek ume alai eta irekitzat jotzen dute eta horregatik Bilbon pelikula bat grabatuko zutela ikusi zutenean, proposatu zioten bideo bat grabatu eta bidaltzea.
Einarrek baiezkoa eman zuen eta 16 segundoko klipa bidali zuten. Handik gutxira, hamabost minutuko proba egiteko deitu zuten eta gainditu egin zuen. Bi aste geroago Felix Viscarret zuzendariarekin egin zuen ordubeteko beste proba bat eta bi astera adierazi zieten hautatua izan zela, betiere azken oztopoa gailentzen bazuen.
Zehazki, bere arreba nagusiaren papera egin behar zuen aktorearekin (Izel Prieto) elkartu zuten eta berehala moldatu ziren.
Grabaketa
Behin iragazki guztiak igarota, 2021eko azaroaren eta abenduaren bitartean ekin zion Einarrek filma grabatzeari. Bere eginkizuna izan zen protagonisten (Miki Esparbe eta Olaia Calderaren antzezleek egin zituzten rolak) semearen papera egitea eta hain gaztea izanik, ez zuen esaldirik buruz ikasteko beharrik izan. "Horregatik batzutan iruzkinak egiten zituen edo galderak egiten zituen grabaketaren erdian. Eten behar zuten, baina barre egiten zuten", gogoratu du Aitziber Elejaldek, bere amak.
Dena den, amak berak argitu du ez zuela askotan hitza hartu grabaketan eta pasarte batzuetan lotan agertzen dela.
Errodaje zaila COVID-19aren ondorioz
Halaber, senideek gogoratu dute grabaketa ez zela erraza izan, COVID-19 birusaren kontrako oso protokolo zorrotza baitzegoen. Hori dela eta, eskolara joateari utzi zion, arriskuak murrizteko eta grabaketa osoa ez geldiarazteko.
Naiara Carmona filmaren aholkulariak joko bat izango balitz bezala aurkeztu zien grabaketa umeei, baina, hala ere, Einarri maiz aspergarria iruditzen zitzaion lana, bereziki, errepikatu behar zutenean. Edonola ere, bere gurasoek azpimarratu dute oso ondo zainduta egon zela beti eta esperientzia polita izan zela.
Aste honetan izango dute aukera emaitzak ikusteko eta irrikitan daude.