Bi hilabete baino gutxiago falta dira Amurrioko Jaiei hasiera emateko eta, behin betiko egitarauaren faltan, gaueko musika eskaintza osatuko duten taldeen berri eman du Amurrioko Udalak. Euskal musika talde ezagunek, banda lokalek zein nazioarteko taldeek osatuko dute "gustu guztientzako" eskaintza.
Abuztuaren 12an, larunbata, Iguarrakoaren jaitsierarekin batera, musikak hartuko ditu Amurrioko kaleak, eta kontzertuek Juan Urrutia Plaza izango dute epizentro. Eskaintza 22:00etan hasiko da Cuatro Bancos talde lokalaren eskutik. Su Ta Gar banda mitikoak hartuko die lekukoa gazte amurrioarrei. Eibartarrek 30 urte baino gehiago eman dituzte oholtzak astintzen, eta duela gutxi plazaratu dute azken lana: Alarma. Disko Sound taldearen Remember 2023 ikuskizunak izango du, ordea, larunbat gaua luzatzearen ardura.
Igandean Orquesta Jamaica Show taldeak girotuko du iluntzea 22:30etatik aurrera. Astelehenean, berriz, Gwaya eta Gozategi taldeek alaituko dute Juan Urrutia Plaza 22:00etatik aurrera. Astelehen gaua ixteko, DJ Blessive bilbotarra egongo da oholtzan musika urbanoa eta komertziala nahasten, goizaldeko 02:00ak arte.
Asteartean Kai Nakaik dantzan jarriko du Amurrio. Euskara ardatz, musika urbanoa eta reggaetoia lantzen ditu artista gasteiztarrak. Ostean, Oxabi erromeria igoko da oholtza gainera, 23:00etatik aurrera.
Abuztuaren 16an, asteazkena, nazioarteko musikaren txanda izango da, Rumbo Tijuana taldeari esker. Corrido mexikarrak eta 1980 eta 1990 hamarkadetako pop-rock espainiarra nahasten du zazpi musikariz osaturiko bandak. 23:00etan Akerbeltz erromeriak emango dio segida talde mexikarrari. Akerbeltzek 15 urte baino gehiago daramatza plazaz plaza, eta ikuskizun indartsua taularatuko dute Amurrion. Azkenik DJ Markelinek musika pintxatuko du, goizaldeko 02:00ak arte.
Abuztuaren 17an, 21:00etan, Patxi Perezen dantza plaza ezagunak emango dio amaiera Amurrioko sanrokeetako musika eskaintzari.