Antolatzaile zein epaileekin zenbait esperientzia ezatsegin izan ostean, Ibai Ruizek aurtengo martxoan erabaki zuen bere ibilbide profesionala amaitutzat jotzea. Borrokalariak ez zuen motibaziorik aurrera egiteko eta alde batera egitea izan zen bere hautua.
Dena den, udan Thailandian egin du egonaldia, bere senide bat hangoa baita, eta zenbait gimnasiotan aritu zen entrenatzen eta ikasten.
Horri esker, hiru aldiz ringera igotzeko proposamenak jaso zituen. "Bi estadiotan lehiatu naiz eta emaitzak onak izan dira".
Berez, Ruizen asmoa zen azkenengo aldiz Thailandian lehiatzea eta agurra behin betikoa izatea: "Edozein borrokalarik daki zein garrantzitsua den Thailandiako jendearentzat kultura hau eta polita iruditzen zitzaidan han igotzea azkenengo aldiz ringera".
Baina lehen borrokaren ostean beste bi gehiagotan parte hartzeko parada suertatu zitzaion eta ilusioz itzuli da lehiara amurrioarra.
Berez, Ruizek ez du parte hartu bere ohiko diziplinan, hots, Kick Boxingean, baizik eta Muay Thain. "Kirol honetan ukondoekin jo daiteke eta arerioa heldu. Puntuatze sistema ere ez nuen menperatzen, baina emaitzak onak izan dira".
Ibai Ruizek emaitza oso positiboak lortu ditu Tailandian izandako egonaldiko hiru borroketan. pic.twitter.com/ZvhPDuoCdL
— Aiaraldea.eus (@aiaraldea) September 8, 2023
Emaitza horien ondorioz, proposamen gehiago heldu zitzaizkion. "Lumpini estadio mitikoan borrokatzeko esan zidaten, baina irailean zenez hitzordua, ezin izan nuen onartu", argitu du kirolariak.
Orain, ilusioz
Esperientzia horiek balioan jarrita, Ruiz Euskal Herriko ringetara igotzeko gogoz dago, baldin eta eskaintza interesgarriren bat egiten badiote.
"Denbora tarte oso motzean motibazio handia jaso dut. Ni duela hamar urte borrokatu nintzen Thailandian eta geroztik ez dut ezer egin. Bi hilabetetan inor ez izatetik proposamenak jasotzera igaro naiz. Izan ere, estadioetan ikuskatzaileak daude eta horrela heldu zitzaidan iraileko eskaintza".