Bihar 18:00etan Basarte futbol zelaian lagunarteko Aiaraldeko derbia jokatuko dute Amurrio Club eta CD Orduña taldeek. Norgehiagoka Non-League Day egitasmoaren barruan kokatzen da eta Bizkaiko hainbat klub batuko dira horretara asteburuan.
Izan ere, profesionala ez den futbol partidak ikustea sustatzen du Non-League Day Britanian sortutako mugimenduak, eta Athletic Clubak jarduera bultzatu du aitortzeko klub txikiek egiten duten lana, bere 125. urteurrenaren ospakizunen barruan.
AEFATen aldeko zozketa
Dena den, kirol hutsa ez da izango jokoan bihar Basarten. Berez, hitzordua elkartasun helburuak izango ditu eta sarrerarik ez bada ordaindu behar ere, zozketa egingo dute atsedenaldian.
Boleto bakoitzak bi euro balioko du eta sariak Athletic Club-Cadiz norgehiagoka ikusteko VIP sarrera bikoitza eta Athletic Clubeko bi kamiseta -emakumezko zein gizonezko lehen taldeek sinatuta- izango dira, Ibaiganeko klubaren opariak, alegia.
Horrez gain, Sabin Guarestiren kontzertua ere egongo da.
Gogoratu beharra dago AEFAT elkarteak finantzatzen dituela ataxia telangiectasia gaitz arraroari buruzko ikerketak eta bihar bilduko den diruaren bi heren talde horretara bideratuko dutela.