Atzo aste hasiera gorabeheratsua izan zuten 07:40an Amurrion autobusa hartu nahi zuten hamabost bidaiarik. Izan ere, Gasteizera joan nahi zuten herritarrak zerbitzu gabe geratu ziren.
Lagun horien artean Leticia Jimenez Elkarrekin Podemoseko alkategaia zegoen, eta egoera azaldu dio Aiaraldea Komunikabideari: "Atzo, ohikoan bezala, 07:40ko autobusa hartzeko asmoa genuen, baina agertu zenean, gidaria jaitsi zen eta galdetu zuen ea norbaitek erreserba zuen. Neska batek baietz erantzun zuen eta igo zen, beste guztiok ez".
Jimenezek adierazi du hori ikusita, gidariari galdetu ziola ea zerbait egingo zuen egoera konpontzeko, eta horrek erantzun ziola behargin hutsa zela eta ezin zuela ezer egin.
Arazo gehiago
Jimenezek berak gertatutakoaren berri eman zuen sare sozialeten eta jazotakoak polemika sortu du. Gauzak horrela, Arabako Foru Aldundiak zerbitzua indartu du gaur.
Hala ere, Leticia Jimenezek nabarmendu du zerbitzua indartuta ere, lau leku libre baino ez direla geratu: "Bat-batean jende gehiago agertzen bada, arazoa errepikatuko da".
Horrez gain, Elkarrekin Podemoseko kideak aipatu du antzeko arazoak daudela Gasteiztik itzultzeko eta atzerapenak ohikoak bilakatu direla.
Bide batez, talde ezkertiarreko militanteak erantsi du Araba osotik heltzen ari direla kexak alderdira garraio publikoaren egoeragatik.