Ikasturtea hasita, Amaurre Ikastetxea buru-belarri dabil berriro Erasmus+ programan. Europar Batasunak finantzatzen duen nazioarteko hezkuntza programak kulturartekotasuna eta jasangarritasuna izango du hizpide eta horrek Lisboako Real Colegio de Portugal ikastetxera eraman ditu hamabi ikasle eta bi irakasle.
Berez, aurten hiru eguneko bisita egin dute eskola horretako sei irakaslek, Amurrioko zentroaren metodologia eta kudeaketa zein antolakuntza moduak ezagutzeko: PYCTO irakurketa-idazketa metodologia, STEAM ekimena edota matematikak ikasteko Singapur Metodoa, Arazoetan Oinarritutako Irakaskuntza, Irakaskuntza Kooperatiboa eta Pentsamenduan Oinarritutako Irakaskuntza uztartzen dituzten proiektua...
Aurreko ikasturteko proiektuak saria lortu du
Horrez gain, ikastetxeak jakinarazi du iaz Erasmus+ programaren barruan abiatu zuten proiektua luzatuko dela. Aurrerago informazio gehiago zabalduko badute ere, aurreratu dute Irlanda, Finlandia eta Maltako ikastetxeekin egin zuten “Erasmus Save Our Second Languages” proiektua aurkeztu dutela European Innovative Teaching Award-en, eta saritu egin dutela. Berez, Paddraig (Irlandako ikastetxeko irakaslea eta proiektuaren koordinatzailea) Bruselara gonbidatu dute saria jasotzera.
Albiste ona ez da hor geratu. Izan ere, Irlanda eta Finlandiako ikastetxeekin beste bi proiektutan lanean jarraitzeko aukera ere eman diete.