Ohi bezala, azaroko lehenengo igandean Gorobel mendi Ibilaldiaren edizio berria antolatu du Amurrioko Mendiko Lagunak Taldeak. Azaroaren 5ekoa, ekimenaren XXXVII. edizioa izango da.
Izen-ematea urriaren 9an zabaldu zuten, eta urriaren 22ra arteko epea egongo da parte hartzeko. Aurten 1.200 izen emate onartuko ditu antolakuntzak, iaz baino 200 inskripzio gehiago. Mendiko lagunak taldeak Aiaraldea Komunikabideari aurreratu dionez, gaur gaurkoz 450 izen emate bete dira dagoeneko.
Internet bidez egin behar dira izen-emateak. Bazkide federatuek 12 euro ordaindu beharko dituzte, eta ez federatuek 16 euro. Horrekin batera, oroigarritzat banatuko duten izerditakoaren neurria ere zehaztu beharko dute parte hartzaileek.
Hiru ibilbide Gorobelen barrena
Azken edizioetan egin bezala hiru ibilbide desberdin prestatuko dituzte, Gorobel mendilerroko bideetan barrenan. Ibilbide nagusiak 42 kilometroko luzera izango du. Menerdigako atakatik igoko da mendilerroaren goialdera, eta Ungino, Eskutxi, Urieta edota Tologorri gailurrak zeharkatuko ditu.
Ibilaldi ertainean parte hartuko duten mendizaleek Menerdigako bidea hartuko dute ere, eta Ungino eta Tologorritik igaro ostean, Paso malotik jaitsiko dira, guztira 26 kilometroko zirkuitua osatuz. Azkenik, martxa txikiak 10 kilometroko ibilbidea osatuko du; Juan Urrutia plazatik Babio mendiraino.
Aiaraldea Komunikabideak, babesleetako bat izanik, probaren jarraipen berezia egingo du eskura dituen komunikazio euskarrietan.
