Liher taldeak nazioarteko bira hasi zuen urriaren hasieran eta asteburuan Alemanian egon dira jotzen. Gero Euskal Herriko, Espainiako Estatuko eta Kataluniako hainbat oholtzetara igoko dira, baina hurrengo hitzordua Amurrion izango da.
Bira hau berezia izango da, taldeak iragarri baitu etenaldia egingo dutela gero, eta oraindik ez dakite berriro batuko diren edo ez. Hortaz, Liher ikusteko azken aukeren artean egon daiteke Amurrioko kontzertua.
Zehazki, bandak Burubio Kultur Gunean eskainiko du emanaldia ostiralean 22:00etan eta interesdunek Aiaraldea Komunikabideak egingo duen zozketan parte har dezakete, hemen izena emanda.
Lide Hernando gitarra-jole eta abeslariak bakarka hasitako ibilbideak jadanik lau diskoko uzta eman du, beste hiru musikarirekin batera. Rock soinuen adar anitzak landu ditu proiektuak 2015etik eta esperientzia bitxiak izan dituzte bidean. Esaterako, Zaballako espetxean jo zuten irailean.
Kontzertuan parte hartzeko asmoa dutenek sarrerak hemen eros ditzakete edota egunean bertan Burubion.