Armuru Elkarteak antolaturiko Erakusketa Filateliko-Numismatikoaren edizio berri bat hartuko du Amurrioko La Casona erakusketa aretoak azaroaren 11tik 25era. Aurtengo edizioaren protagonista nagusia 'Guk' eskultura izango da; "izan ere, 20 urte bete ditu amurriarren ikono gisa", azaldu du Koldo Izagirrek, Armuru Elkarteko kideak. Guk eskulturari bakarrik ez, iaz zendu zen Angel Camino egileari ere egin nahi diote aitortza.
Horretarako, zigilu-markatzaile berezi bat sortu dute, eta erakusketak iraun bitartean Correoseko bulegoak Amurriotik bidaliko dituen gutun guztiak matasellatuta aterako dira. Hori bakarrik ez, 'Guk' eskulturaren irudia izango duten zigilu eta gutun-azal eta txartel "maximoak" ere ekoiztuko dituzte erakusketaren testuinguruan. "Gutun-azala eta txartel 'maximoa' zigilu bat jaulkitzen den unean egin ohi dira. Zigilua gutun-azal batean itsasten da, zigiluaren gaiari buruzko irudi batekin edo agertzen den irudiarekin, eta zigilua matasellatu egiten da zigilua igorri zen eguna jasota gera dadin", adierazi du Izagirrek. Numismatika eta filatelia zaleek azaroaren 14an izango dute oroigarrizko zigilu-marka erabiltzeko aukera, euren bilduma pertsonaletarako.
Zigilu eta txanpon erakusketa
Bi astez egongo da ikusgai Armuru Elkarteak La Casonan prestaturiko erakusketa. Lan egunetan 17:00etatik 19:00etara egongo da ikusgai. Jai egunetan, aldiz, 10:00etatik 14:00etara. Astelehenetan, ordea, erakusketa itxita egongo dela azaldu dute antolatzaileek.
Gai ugari jorratuko dituzte bertan, eta hainbat dira erakusketara gonbidatutako bildumak: Operako binokularrak, brontzezko zaharkinak, Athleticeko peñen egutegiak, Heraclio Fournierren kartak edota garagardo txapak.
Erakusketa nagusia, ordea, txanpon eta zigiluena da. Txanpon eta billeteei dagokienean, atal ugari atonduko dituzte: Guda Zibilean igorritako txanponen bilduma, Kanadako hegazkin-gidari ospetsuekin lotutako txanponen bilduma, XIX. mendeko eta XX. mendeko pezeten bilduma zabala, Austria eta Alemaniako euroenak, akatsak dituzten billeteenak edota munduko billeteenak, besteak beste.
Zigiluen erakusketak ere gai ugari jorratuko ditu, baina nagusiki naturarekin zerikusia duten zigiluak jarriko dituzte ikusgai aurtengo edizioan.
Ekintza osagarriak
Erakusketa hainbat ekitaldirekin osagarrituko dute Armuru Elkarteko kideek. Azaroaren 11n irekiera ekitaldia egingo dute 12:00etan, eta egun horretan "jakintza numismatikoa" lehiaketa ospatuko dute, "herriko txikienak numismatika eta filateliara erakartzeko helburuarekin". Azaroaren 15ean eta 16an, ordea, hitzaldi bana eskainiko dute; filateliari eta numismatikari buruzkoak, hurrenez hurren.