‘Lurraren defentsan’ topaketa egingo da datorren ostiralean -urriak 27- Amurrio Antzokian, SETEM Hego Haizearen eta Medicusmundi Arabaren eskutik. 18:00etan izango da zita eta sarrera librea izango da toki guztiak bete arte.
Euskal Herriko eta Guatemalako landa-ekimenak ezagutaraztea izango da topaketaren xedea. Hainbat motatako egitasmoak dira, baina guztiek dute bereizgarri bera: “lurraldearen eta ekoizpen eta kontsumo eredu arduratsu eta benetan jasangarrien defentsa komuna” egiten dutela.
Horretarako, bi ikus-entzunezko proiektatuko dituzte. Medicusmundi Arabak ekoiztutako Alternatiba bidezkoak eta iraunkorrak konektatuz dokumentala eskainiko dute lehenbizi. “Lan horrek agerian jarri nahi ditu Araban dauden kolektiboak, sareak eta ekimenak, Bidezko Merkataritzako eta kontsumo arduratsuko ekimenen alde egiten dutenak eta eredu sozial eta ekonomiko bidezkoagoak, jasangarriagoak eta solidarioagoak eraikitzen modu eraginkorrean laguntzen dutenak”, azaldu dute antolatzaileek, eta nabarmendu dute filman agertzen diren eragileetako bi direla Aiaraldekoak: Aiaraldea Ekintzen Faktoria edo Amurrioko Bidezko Merkataritzako Lagun Taldea.
Jarraian, SETEM erakundeak ekoiztutako bideo sorta bat jarriko dute, Landa eremuko emakumeak lurraren defentsan izenpean. Aurreratu dutenez, era ekologikoan ekoizten duten Arabako zein Guatemalako landa-eremuko emakumeak dira ikus-entzunezko horietako protagonistak, eta Ekoizpen Urduñako kideak agertzen dira, besteak beste.
Guatemalako gonbidatuak
Protagonisten hitzartzeekin tartekatuko dituzte proiektzioak. Hermelinda Chicop Choxin AFEDES erakundeko emakume maia kaqchikela igoko da oholtzara, besteak beste; eta emakume indigenek bizi dituzten baldintzak izango ditu hizpide. Berarekin batera, ikus-entzunezkoetan agertzen diren beste protagonistetako batzuk ere hartuko dute hitza, eskualdekoak barne.
