Hitzordu garrantzitsua izan zuen Ibai Ruizek larunbatean La Casilla kirolgunean. Iberiako Iska Txapelketa eskuratzeko Vasco Pinto portugaldarrarekin borrokatu zen K-1 diziplinan eta, galdu bazuen ere, gustura geratu da egindakoarekin.
"Egurra eman genion elkarri eta zaletasuna sortzeko moduko borroka egin genuen"
Ruizek adierazi dio Aiaraldea Komunikabideari Vasco Pintok eta berak izandako norgehiagoka gaueko onena izan zela eta zaletasuna sortzeko modukoa izan zela: "Egurra ematera atera zen Vasco Pinto hasieratik eta egurra eman genion elkarri bost asaltoetan. Oso berdindua egon zen borroka, baina berak modu azkarrean jokatu zuen laugarren roundean. Talka egitera joan ordez, aurreko asaltoetan bezala, gehiago mugitu zen eta kontzentrazioa galdu nuen. Detaile txikiengatik galdu nuen, baina aitortu behar dut berak oso modu argian jokatu zuela".
Leher eginda, baina pozik Aiaraldeko zaleengatik
Garaipena berea izan ez bazen ere, Ruiz ez zen zapore guztiz mikatzarekin joan etxera. Oraindik "leher eginda" dagoela aipatu dio Aiaraldea Komunikabideari, baina baita pozik ere.
"Aiaraldeko zaleek giro ikusgarria sortu zuten ringera atera nintzenean eta oso eskertuta nago"
Zoriontasunaren arrazoia Aiaraldeko zaleen erantzuna izan zen: "Ringera atera nintzenean sekulako giroa sortu zuten eskualdeko zaleek eta hori bikaina izan zen, ikusgarria. Babes hori sentitu nuen orain arte izan dudan borrokarik gogorrenean eta bihotzez eskertu nahi dut. Ez horregatik bakarrik, borroken antolatzaileak ere pozik zeuden eta hori garrantzitsua da gehiagotan ni deitzeko. Hori ezinezkoa litzateke zaleen laguntzarik gabe. Hortaz, mila esker, benetan."
Hurrengo helburua, borrokaldia abenduaren 23an
Gauzak horrela, Ibai Ruizen hurrengo ekimena Aiaraldeko borrokalariekin erakustaldia antolatzea izango da abenduaren 23an eta jadanik hasi da dena prestatzen "kirol gutxitu honek ikusgarritasuna izan dezan".