Amurrioko Maskuribai kalean ez da txirrindularien eta oinezkoen segurtasuna bermatzen, EH Bilduren aburuz. Hori dela eta, mozioa aurkeztu du oposizioko talde politikoak, azaroko Udal Osoko Bilkuran eztabaidatua izan dadin.
Koalizioak nabarmendu du amurrioar askok "egunero" erabiltzen dutela kale hori, "bai Maskuribaiko industrialdera joateko, bai El Refor kirol-gunera iristeko, bai aisialdirako". Oharrean nabarmendu dutenez, "bi puntu gatazkatsu" daude bidean. "Lehenengoa, Etxegoien erreka zeharkatzen duen zubiak sortutako estugunea da, zubiak espaloiaren jarraitutasuna eragozten baitu", azaldu dute EH Bilduko kideek, "bigarrena, berriz, Goiena kalea eta Maskuribai kaleko egokitu gabeko tartea lotzen dituen bidegurutzea da. 'Amaitu gabe' dagoenez, arazoak sortzen ditu oinezkoen, txirrindularien eta ibilgailu motordunen artean".
Gauzak hala, "irtenbideak" eskatzen ditu talde politikoaren mozioak, "oinezko, txirrindulari eta ibilgailu motordunen elkarbizitza segurua bermatzeko". URA agentziari ere zuzendu zaio koalizioa, "behar beste laguntza" eman dezan, "maila teknikoan zein ekonomikoan, errekaren bidegurutzean eman daitezkeen irtenbideetarako".