Lidergoari eutsi dio Mirari Gotxik, Amorebieta Ziklokros Lasterketan irabazita

Erredakzioa 2023ko aza. 13a, 14:10

Mirari Gotxi Amorebietako lasterketan. / Aiara Txirrindularitza Elkartea

Garaipena lortzea ez zen erraza izan, arazo mekanikoa izan baitzuen amurrioarrak zirkuituaren azken itzulian. Hala ere, Euskadiko Txirrindularitza Federazioaren Ziklokros Challengearen kadete kategoriako maillotari eutsi dio.

Garaipen berriarekin itzuli zen atzo etxera Mirari Gotxi Aiara Txirrindularitza Elkarteko kidea. Amurrioarrak lortu du beste astebetez liderraren maillota izatea, baina sufritzea egokitu zitzaion.

Izan ere, Amorebietako Ziklokros Lasterketa zirkuituaren hiru itzulik osatzen dute eta azkenean arazo mekanikoa izan zuen Gotxik. Hain zuzen, bizikletaren katea atera zitzaion eta denbora dezente behar izan zuen matxura konpontzeko.

Hala eta guztiz ere, Gotxi buruan jarri zen eta lehenengoa zeharkatu zuen helmuga, bigarren sailkatuak 15 segundo beranduago amaitu baitzuen proba.

Aipatu beharra dago lokatzaz beteriko lasterketa izan zela atzokoa eta, hortaz, exijentea. Edonola ere, bere laugarren garaipena eskuratu zuen Gotxik eta Euskadiko Txirrindularitza Federazioaren ziklokros Challengearen kadete kategoriako lidergoa mantendu du.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide