David Palmada abenturazale hutsa da eta gaur 19:00etan Amurrio Antzokian eskaladari lotutako dokumentala eskaintzearekin nahikoa ez duenez izango, bihar mintzaldia egingo du Aiala Motor Klubarekin.
Zehazki, gaur kontatuko du nola burutu zuen 475 metroko jaitsiera-bidea (hau da, eskaladan egiten denaren guztiz kontrakoa) Kantabriako kobazulo batean. Bederatzi egun behar izan zituen horretarako.
Bihar, aldiz, kirola baztertu gabe, oso bestelako diziplinari buruz arituko da. Berez, 12:00etan izango da hitzordua Amurrio Antzokian berriro, baina publikoak eta gaiak ez du zerikusirik izango. Hain zuzen, David Palmada 'Pelut'-ek mekanikari buruz hitz egingo du, baina abenturara lotuta betiere.
Izan ere, kataluniarra Dakar lasterketako mekanikaria da eta gidari ospetsu askok utzi dute euren ibilgailuen ardura bere eskuetan: Isidre Esteve , Nani Roma, Marc Coma, Jorid Arcarons...
Jadanik 21 ediziotan parte hartu du Pelutek eta 22.na prestatzen ari da Pedrega Team taldearekin.
Palmada ezaguna bilakatu zen motorraren munduan Dakar lasterketetako etapetan zuzenekoak emititzen hasi zelako kanpalekutik bertatik.