Bolo-bolo ibili dira sare sozialetan barrena asteburuan Nerbioiko ur-jauzi ingurutik jasotako irudiak. Delikako arroilaren alde batetik bestera bederatziehun metroko soka luzatu eta honen gainean orekan aritu dira ausart ezezagun batzuk.
Euskal Herriko orekarien balentria Nerbioi ibaiaren ur-jauzian.
— Unai Etxenausia (@EtxenausiaUnai) November 18, 2023
900 metro luze dituen soka gainean, eta 300 metroko amildegia oinpean.
Mugarri bat Euskal Herrian.
: Nacho Jauregui eta Unai Etxenausia@berria pic.twitter.com/5KVJjK5r8a
Oreka Tolosa kirol taldeko kideak dira balentriaren atzean egon direnak. Slacklinean edota honen muturreko bertsioa den highlinean aritzen dira klub gipuzkoarreko kideak. Hain zuzen ere, Mendi Film nazioarteko mendi eta abentura zinema jaialdirako dokumentala grabatzen aritu dira Daniel Cascales zinemagilearekin batera.
Aiaraldea Komunikabidea Daniel Cascalesekin jarri da harremanetan grabaketaren nondik norakoak ezagutzeko. Mario Hidalgo Oreka Tolosa taldeko kidearena izan zen Nerbioiko ur-jauzia alderik alde soka gainean gurutzatzearen ideia. Hidalgok aspalditik zituen azpiegitura muntatzeko beharrezko baimenak, eta inori ezer esan aurretik, Cascalesegana jo zuen, proiektua elkarlanean garatzeko.
"Martxoan dosier bat osatu genuen, baita proiektuaren teaser bat ere", azaldu du zinemagileak. "Material guztia bildu eta Mendi Film jaialdira bidali genituen. Udan jakinarazi ziguten Mendi Film Bizkaia Ternua IV. beka eskuratu genuela". Bekak eskaintzen duen dirulaguntzarekin, grabaketari ekin zioten Hidalgok eta Cascalesek.
Prestakuntza hilabete luzeak izan dira. Azkenean, iragan azaroaren 13an hasi ziren highlinea muntatzen. "Astebete igaro dugu Delika inguruan. Ohikoan baino konplexuagoa izan da highline honen muntaketa, lau egun behar izan ditugu azpiegitura guztia prestatzeko". Behin guztia probatuta, asteburuan hasi ziren Hidalgo eta Oreka Tolosako gainerako kideak soka gaineko oreka neurtzen.
2024an estreinaldia
Daniel Cascales oso pozik dago bizitako esperientziarekin eta grabatutakoarekin: "Orain lan eskerga dut aurretik, irudi guztiak editatzeko, baina eskertu egiten dut lan hori, oso gogoko dut". Dokumentalak highlinea prestatzeko prozesu osoa erakutsi nahi du, eta 2024ko Mendi Film jaialdian estreinatuko dute.