Urteroko zitari heldu diote, aurten ere, Amurrio Trail taldeko kideek. Abenduaren 23 eta 24ean Babio mendia elkartasunaren ikur bilakatuko dute. "Aukera berriak denontzat" lelopean 16 ordu Non-Stop ekimenaren V. edizioa eta Babio Igoeraren VII. edizioa antolatuko dituzte.
Trail taldeko kideek aurreratu dutenez "oso gogotsu" daude aurtengo erronkari heltzeko. Asmoa, 2022ko edizioan jarritako marka gainditzea da Amurrio Trail taldekoen hitzetan. Iazko ekimena oso arrakastatsua izan zen; guztira 6.000 euro bildu zituzten Alzheimerra eta beste dementzia batzuen aurka borrokatzen duen AFARABA elkartearentzat.
Aurten bildutako diru guztia Down Sindromea eta bestelako Ezintasun batzuk dituzten pertsonekin lan egiten duen Euskal Herriko fundaziora bideratuko dute.
Non-Stop erronka
Abenduaren 23an. 18:00etan, hasiko dute hamasei orduko kirol erronka. Une horretatik aurrera, eta abenduaren 24ko goizera arte, orduro kirolari talde bat abiatuko da Juan Urrutia Plazatik Babio mendiraino. Joan-etorriko hamar kilometroko ibilbidea da, 400 metroko desnibel positiboa duena, eta gau guztian zehar hornidura puntu txiki bat egongo da tontorrean.
Gaua gehiago girotzeko, Lehian erromeriak kontzertua eskainiko du Amurrioko plazan, 22:00etatik aurrera. Traill taldeak txosna solidarioa jarriko du.
Izen ematea Euskal Mendizale Federazioaren web-orrian egin beharko da. Inskripzioak bost euroko kostua izango du, eta diru guztia Down Sindromearekin lan egiten duen fundazioak jasoko du. Aurten, gainera, berritasun bat gehitu dute. Edozein elkarteko edo negoziok aukera izango du hogeita hamar euroko prezioan igoera bat erosteko, babesletza formatuan.
VII. Babiora Igoera
Ekimenaren hitzordu nagusia abenduaren 24an izango da. 10:00etan Juan Urrutia plazatik irtengo dira ehunka mendizale Babio mendiaren gailurreraino. Ekimenean Montes Solidarios eta Ezina Ekinez Egina elkarteen laguntza jasoko dute bidean, pertsona oro izan dadin tontorrera iristeko gai. Biak irabazi-asmorik gabeko bi erakunde pribatu dira eta dibertsitate funtzionala duten pertsonei zuzendutako mendiko jarduerak sustatzen eta antolatzen dituzte. Horretarako, pertsona itsuen eta ikusmen txikia duten pertsonen mendiko gidaritzan trebatutako pertsonak daude, bai eta Joelette aulkia erabiltzen eta gidatzen dutenak ere", azaldu dute Amurrio Trail Taldeko kideek.
Babioko puntan, Olentzeroren bisita berezia jasoko dute parte-hartzaile guztiek. Amurriora itzultzerakoan, aldiz, txokolate eta txistorra janaz gozatu ahalko dute Juan Urrutia Plazan,