Gogor kritikatu du Amurrioko EH Bilduk udal-gobernu taldearen funtzionamendua, gaur goizean Guk eskulturaren aurrean egindako prentsa-agerraldian. Azken hilabeteetako udal-dinamika "kaotikotzat" jo du oposizioko taldeak.
Gobernu Batzordearen eratzeaz geroztik ezarritako funtzionamendua guztiz desegokia dela azpimarratu du EH Bilduk. Hain zuzen ere, EAJk eta PSE-EEk Tokiko Gobernu Batzorde berritik kanpo utzi zuten koalizio abertzalea. Geroztik, udalaren egunerokoan "kaosa" nagusitu dela aldarrikatu du oposizioko taldeak.
"Helarazi ziguten egutegi instituzionalak bi batzorde egonkorren maiztasuna baino ez du zehazten. Beraz, ez dago jakiterik gainontzeko batzorde guztiak noiz izango diren", salatu dute Jon Berganza eta Angela Rico zinegotziek gaurko hitzartzean.
Koalizioak azaldu duenez, badira azaroaren 29ra arte deitu ez diren batzordeak, segurtasunari eta parte hartzeari lotutakoak kasu. Beste batzuk, aldiz, eduki gabekoak izan direla salatu dute, edo hiru minutuko iraupena izan dutela soilik.
EH Bilduk gogora ekarri du batzordeko lehendakari izateagatik eta Tokiko Gobernu Batzordera zein Osoko Bilkurara bertaratzeagatik 1.500 euro jasotzera hel daitezkeela zinegotziak, "dedikaziorik gabe".
"Guztiz mugatuta ikusten ari gara oposizio eskubidea baliatzea"
Arduraz jokatzeko deia
Egoera horren aurrean, udal funtzionamendua aldatzeko eta arduraz jokatzeko deia luzatu die EH Bilduk udal gobernu taldeko zinegotziei. "Dinamika inprobisatu eta zoro honetan lan egitera behartuta gaude eta guztiz mugatuta ikusten ari gara oposizio eskubidea baliatzea. Horregatik, udal gobernu taldea osatzen duten zinegotzi guztiei arduraz eta erantzukizunez jokatzea eskatzen diegu. Gure herriaren etorkizuna dago jokoan", amaitu dute hitzartzea Berganza eta Ricok.