Urtarrilaren 5ean argitaratu zuen Amurrioko Udalak udal frontoia, Reforreko kirol-gunea eta Mendikoko frontoia kudeatzeko lehiaketa publikoa. Lehiaketa horren pleguak kritikatu ditu Aiaraldeko Euskalgintza Kontseiluak, euskararen aurkakoak direla argudiatuta.
Hain zuzen, honakoa adierazi du euskalgintza eragileak: "Duela 7 urte, zerbitzua lizitatzerakoan, langileen %50ak euskaran PL2a egiaztatzeko derrigortasuna ezarri zen pleguetan. Lizitazio berrian, baldintza hori ezabatu egin du Udalak eta langileei ez die inongo hizkuntza eskakizunik ezartzen. Langile horiek herritarrei harrera egiten diete aipatutako kirol instalazioetan, eta hemendik aurrera ez dute zertan euskara jakin beharko. Beraz, ez dira bermatuko erabiltzaileen hizkuntza eskubideak. Erabakia, gainera, Udalaren Euskara Planaren aurkakoa da, Udalak berak eman beharko lukeen zerbitzu bat kanpora ateratzen denean, azpikontratatutako langileei udal langileei lan horietarako ezartzen zaien hizkuntza eskakizun bera ezartzea eskatzen baitu".
"Langile horiek herritarrei harrera egiten diete aipatutako kirol instalazioetan, eta hemendik aurrera ez dute zertan euskara jakin beharko. Beraz, ez dira bermatuko erabiltzaileen hizkuntza eskubideak"
EH Bilduren kritika
EH Bilduk ere plazaratu du pleguen aurkako kritika. Bat egin dut euskalgintza kontseiluak adierazitakoarekin, baina beste afera bat ere azaleratu du, langileen lan baldintzei lotutakoa. Opozisioko taldearen ustez, "langileen baldintzen kontrako erasoa" da lehiaketa. Horrez gain, talde politikoak azpimarratu du egungo enpresarekin epaiketa bat dagoela abian. "Gerta liteke prozesu judizialak kontratua deuseztatzea eta enpresari kalte-ordaina eman behar izatea" ohartarazi du EH Bilduk.
Horren aurrean, koalizioak aldarrikatu du etengabe ematen diren zerbitzuak publiko bilakatu behar direla, espazioen kudeaketa, kontrola eta garbiketa kasu.