Aritz Arberas da LIDL-Trek txirrindularitza taldeko prestatzaile fisiko berria. "Eskalatzaileak entrenatzea izango da nire arduretako bat", azaldu dio Aiaraldea Komunikabideari.
Ez da erabaki erraza izan, Pello Bilbao txirrindulariarekin elkarlan luzeko ibilbidea egin baitu azken urteotan. "Gustura nengoen Bahrein Victoriousen eta Pello nire laguna da, baina taldea aldatu dudan bakoitzean profesionalki hobetzea lortu dut eta uste dut hemen arlo profesionalean urratsa egingo dudala".
Aldaketa horretan garrantzitsua izan da Josu Larrazabal orozkoarra eta LIDL-Trek-eko arduraduna. "Aurten LIDL enpresa sartu da proiektuan eta aurrekontua handitu dute. Txirrindulari oso onak eta etorkizun handikoak dituzte eta erronka izango da epe luzean munduko talderik onena izatea, baina ez edozein moduan. Taldeko kideak zaindu behar ditugu", argitu du Arberasek. Momentuz, Giroan, Tourrean eta lasterketa klasikoetan lan ona egitea izango da euren helburua.
Gauzak horrela, aurten Europako txoko ugarira bidaiatzeko beharra izango du amurrioarrak: Teidera joko du entrenatzera eta gero baita Portugalera, Italiara eta Frantziako Tourrera ere, lehiatzera. Horrez gain, barne mailako lan ugari izango du, errendimendu azterketak egiten.
Urrats berria
Atzera begira, Arberasek espero du bere gaitasun profesionalak hobetzea esperientzia berri honekin, orain arte egin bezala: "Astanara ideia berriak eraman nituen eta batzuek funtzionatu zuten. Bahreinen, aldiz, errendimendua muturrera eramaten eta lasterketetan alde txikienak ere lantzen ikasi nuen. Momentuz, bertako prozesuak eta kideak ezagutzen ari naiz LIDL-Trek taldean".