Cuatro Bancos Amurrioko musika taldeak aukera guztiak ditu Viñarock jaialdiak abian duen lehiaketako hurrengo fasera igarotzeko. Izan ere, antolatzaileek bigarren aldiz deitu dute lehiaketa talde berriak kartelean txertatzeko eta amurrioarrak bederatzigarrenak dira 418 bozekin. Oraindik bozkatzeko aukera dago.
Bozka gehien jasotzen dituzten lehenengo hogei taldeak bigarren fasera igaro eta epaimahairen mende geratuko dira. Adituek bi hautatuko dituzte oholtzara igo daitezen aurtengo Viñarocken, 30 minutuko kontzertua eskaintzeko. 500 euro ordainduko dizkie antolakuntzak eta bi gonbidapen ere izango ditu taldekide bakoitzak.
Horrez gain, Villarobledoko jaietan ere emanaldia izango dute irabazleek eta 500 euro jasoko lituzkete zuzeneko horren truke.
Jaialdia maiatzaren 2tik 4ra bitartean izango da Villarobledon eta Lendakaris Muertos, Soziedad Alkoholika, The Baboon Show, Zea Mays, Green Valley edota Sho Hai taldeek joko dute, adibidez.
Ametsa
Cuatro Bancoseko kideek azaldu dute Viñarock jaialdian jotzea ametsa betetzea izango litzatekela eurentzat: "Nolabaiteko bultzada izango genukeela uste dugu, eta, batez ere, guretzat musika talde handiekin oholtza partekatzea ohore bat delako".
Talde amurrioarra bost gaztek osatzen dute eta hip hop musika dute ardatz, bestelako generoekin uztartuta -rock edo metal, adibidez-. Jadanik bi EP argitaratu dituzte eta laster abesti berriak zabaltzea espero dute.