Tubos Reunidosek enplegua erregulatzeko beste espediente bat ezarri nahi duela salatu dute

Txabi Alvarado Bañares 2024ko ots. 7a, 22:15
Iaztik indarrean dagoen espedienteari jarraipena emango lioke murrizketa berriak. / Aiaraldea.eus

ELA sindikatuak azaldu duenez, orain indarrean dagoenari jarraipena emango lioke espediente berriak. 

Langileei iaztik aurtengo otsailera arte ezarritako lanaldi murrizketa denboran luzatzeko asmoa du Tubos Reunidosek. Aldi Baterako Enplegua Erregulatzeko Espediente berria aurkeztu du Amurrion finkatutako multinazionalak, eta ostiral honetan izango da kontsulta aldiko lehen bilera. 

Hala jakinarazi du ELAk ohar baten bidez. Sindikatuaren aburuz, enpresak "orain arteko estrategiari" eutsi nahi dio, mota horretako espedienteak baliatuta  "langileen baldintzak ahultzeko, eta etekinak maximizatzeko".

Sindikatuak nabarmendu du Tubos Reunidosek 54,5 milioiko irabazi garbia izan zuela 2023ko lehen sehilekoan, "iazko aldi berean baino 52 milioi gehiago", eta oraindik argitaratzeke dituztela iazko emaitza ekonomiko osoak. Gauzak hala, "galerak sozializatu eta etenkinak pribatizatzea" leporatu diote enpresari.

Horren aurrean, ELAk gogorarazi du helegitea jarri ziola aurreko espedienteari, eta Gasteizko lan arloko epaitegiaren ebazpenaren zain dagoela. "ELAk konpromisoa hartzen du ABEE berri honetan Tubos Reunidos enpresako langileen interesak defendatzeko eta enpresaren zikoizkeria salatzeko".

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide