Otsailaren 15ean ireki zituen ateak Oviedoko Pastel Pintura Biurtekoaren VII. edizioak. Nazioarteko 117 artisten lanak bildu ditu pintura lehiaketak, guztiak pastel teknikarekin eginak. Fernando Muñoz amurrioarrak aipamen berezia lortu du biurtekoan, eta bere izena finalisten zerrendan agertu da.
Paisaje leonés obra aurkeztu zuen Muñozek Oviedoko Biurtekoko lehiara. Izan ere, lotura estua du margolari amurrioarrak Gaztelako eskualde horrekin. Muñozen lana, gainerako obrekin batera, Oviedoko Calatrava Erakusketa eta Kongresu Jauregian egongo da ikusgai larunbatera arte (martxoak 2).
Ibilbide artistiko oparoa
Fernando Muñozek Amurrioko Fernando Aranoa arte eskolan ekin zion margolaritza trebakuntza jasotzeari, 1987. urtean. Lehenengo urte horietan Jose Luis Alvarez Velez de Vitoria, Izaskun Ibarretxe, Eva Isasi eta Montse Gonzalez izan zituen irakasle.
Denborarekin pastel-margolaritzan espezializatu zen; Gasteizen egindako ikastaroan aurrena, eta, gerora, Leonen jaso zuen formakuntzari esker. Leonen Jose del Riego margolaria izan zuen irakasle; gaur egun Oviedoko biurtekoa antolatzen duen ASPAS elkarteko lehendakaria, hain zuzen ere.
Hainbat izan dira azken urteetan Fernando Muñozek antolatutako erakusketak; Amurrion, Urduñan, Orozkon edota Gasteizen. 2022. urtean XXXVI. Amurrio Hiribildua pintura lehiaketako tokiko saria irabazi zuen.