Ostiral arratsaldean aurkeztu zuen EAJk Amurrioko Guk pasealekuan Eusko Legebiltzarreko zerrenda arabarra. 'Indar berria' lema izanik, Jose Antonio Suso Arabako Buru Batzarreko presidenteak hitza eman zien Jonatan Moreno, Eneritz Alonso, Ander Añibarro eta Ainhoa Campo zerrendakide aiaraldearrei eta Joseba Diez Antxutegi zerrendaburuari.
Ekitaldiaren ardatza izan da jeltzaleek indar eta odol berria bultzatu dutela EAJren proiektua indartzeko. Zentzu horretan, Jonatan Moreno izan da hitza hartzen lehenengoa eta alderdian konfiantza eskatu du, bere ustez, urte luzez erakutsi baitu bere gaitasuna.
Eneritz Alonsok estreinako aldiz hartu du hitza ekitaldi publiko batean aldarrikatzeko hezkidetza, kontziliazioa eta gazteei lehentasuna emateko beharra.
Ander Añibarrok, bere aldetik, Iñigo Urkulluri eman dizkio eskerrak hamabi urtez Eusko Jaurlaritzan egindako lanagatik eta erantsi du bere kudeaketak bete duela agindutakoa, besteak beste, langabezia %10etik jaistea.
Halaber, laudioarrak ohartarazi ditu alderdikideak beste talde batzuek egingo dituzten proposamen utopikoen aurrean, eta aldarrikatu du errealistak izateko premia, gobernatzeko ardura izango dute eta.
Ainhoa Campok Aiarako Udalak, Arabako Batzarretan eta Arabako Foru Aldundian izandako esperientzia balioan jarri du, eta ziurtatu du alderdiaren mesederako lan egiteko prestutasun osoa duela.
Azkenik, Joseba Diez Antxustegik hitz egin du publikoaren aurrean aipatzeko, futbolean bezala, poztasun gehien sortzen dituzten partidak direla zailenak. Horrela, adierazi du ziur dagoela Araban irabaziko dutela.
Halaber, zerrendaburu arabarrak defendatu du EAJk egindako lana eta argudiatu du Arabako zerbitzu publikoak eta osasun sistema publikoak estatu osoko onenak direla, arazoak izan arren. Modu horretan, EAJren jarraikortasunaren alde egin du, "urte luzez irabazitakoa tarte txikian galdu daitekelako".