Urduñak egin bezala, Amurrioko Udalak ere onartu du mozioa Arrastariako herritarrek parada izan dezaten Urduñako nagusien egoitza baliatzeko. Izan ere, Urduñatik gertu egon arren, administratiboki Amurrioren parte dira Arrastariako kontzejuak.
EH Bilduk aurkeztu zuen testua eskaera horrekin eta EAJk bat egin zuen proposamenarekin. Soilik PSE-EE agertu zen egitasmoaren kontra.
Mozio bera onartu zuen Urduñako osoko bilkurak martxoan, eta orain bi udalek hartu dute konpromisoa testuan eskatzen dena lantzeko. Araba eta Bizkaiko Foru Aldundiei emango zaie onartutakoaren berri, haien artean hitzarmena adosteko.
EH Bilduk Arabako Batzar Nagusietan ere erregistratu zuen mozioa, maila instituzional guztietan gaiari irtenbidea emateko. "Arrastariako biztanleek urteak daramatzate gai honi buruzko konponbideak eskatzen. Ikusita Arabako eta Bizkaiko Foru Aldundiek hau ahaztuta zutela, gaia berrartu dugu, oraingoan bai, hitzarmen hau egin dezaten", adierazi du EH Bilduk.
Arrastariako herritarren mesederako
EH Bilduk uste du akordio honen bitartez asko hobetuko dela Arrastariako biztanleen bizitza. 55 plaza ditu Urduñan kokatuta dagoen egoitza publikoak. Horietatik, 45 Bizkaiko Foru Aldundiarekin hitzartuta daude, eta gainontzekoak pribatuak dira.
EH Bilduk azaldu duen bezala, Urduña Bizkaia izanda, bertan dagoen egoitza publikoko plazak eskuratzeko Bizkaian erroldatuta egon behar dira erabiltzaileak. Urduñaren kokapena eta tamaina kontuan izanda, Arabako herriz inguratuta, ezinezkoa da egoitzak dituen plaza publiko guztiak betetzea. Hala ere, Arrastariako (Delika, Tertanga, Aloria eta Artomaña) adinekoek, Urduñatik oso gertu bizi arren, ezin dute bertan plazarik lortu, eta haien etxeetatik oso urrun dauden Amurrio, Laudio edo Gasteizko egoitzetara joan behar dira.