Txakolin Egunaren XXV. edizioa ospatuko dute maiatzaren 26an

Aimar Gutierrez Bidarte 2024ko mai. 12a, 07:00

2023ko uztaren emaitza dastatu ahalko da Txakolin Egunean. / Aiaraldea.eus

Ostiralean aurkeztu zuten Arabako Txakolinaren festa. Jatorri deitura osatzen duten zazpi upategiek egun osoko egitaraua eta festa prestatu dituzte, tokiko ardoa promozionatzeko

Txakolin Egunaren XXV. edizioa ospatuko dute maiatzaren 26an, Arabako Txakolinaren egun handia. Jatorri deitura osatzen duten zazpi upategiek 2023ko uztaren emaitzak aurkeztuko dituzte jendaurrean, egun osoko egitarau batekin.

Hain zuzen ere, iazko uztatik txakolin "bikainak" ekoitzi dituztela baieztatu du Jose Antonio Merino. Salmenta aurreikuspenekin ere baikor azaldu da Arabako Txakolina elkarteko kudeatzailea, eta "maximo historikoak haustea" espero du. Nazioarteko merkatua dute begiz jota txakolin ekoizleek, Estatu Batuak eta Erresuma Batua esaterako, baina tokiko kontsumitzaileen artean ere gorakada izatea dute erronka.

Egun osoko festa

Maiatzaren 26ko egitarauaren xehetasunak aurkeztu dituzte Amurrioko udaletxean egindako aurkezpenean. Raisa Alava artistak eginiko kartelak iragarriko du festa. Alavak berriki jaso du Urrezko GUK Saria, bere ibilbide artistikoagatik.

Goizetik arratsaldera Arabako Txakolina izango da protagonista nagusia Amurrion. Ohiko protokolozko ekitaldiarekin hasiko dute eguna, eta bertan David Lecanda laudioarra izendatuko dute Arabako Txakolinaren enbaxadore berria. Mariano Alavak azaldu dunez, hainbat jatetxe zabaldu ditu Lecandak Madrilen, eta beti izan du oso presente Aiaraldeko produktuen garrantzia.

12:00etan zabalduko dute parkeko azoka eremua. Bertaratzen diren herritarrek aurtengo txakolina eta tokiko hainbat jaki dastatzeko aukera izango dute. Musika eskaintza ere egongo da azoka eta festa girotzeko, 13:00etan Belgorri amurrioarrek kontzertua eskainiko dute, eta Akerbeltz erromeriak arratsaldera arte luzatuko du festa gogoa, bigarren urtez jarraian.

Tiketen aurre-salmenta

Txakolin Eguneko antolatzaileek gogorarazi dute Internet bidez egin daitekeela txakolin eta janari postuetako produktuak eskuratzeko tiketen erosketa. Iaz ilara luzeak sortu ziren, eta egora hori ez errepikatzeko, hobetu egin dute erosketa sistema. Honezkero eskuragarri daude esteka honetan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide